रौतहट बम बिस्फोट प्रकरण- अफताब आलमका भाइद्वारा ‘अपराध’ स्वीकार
काठमाडौं । पहिलो संविधानसभा निर्वाचनताका रौतहटमा भएको बम विस्फोट प्रकरणका अभियुक्त मोहम्मद महताब आलमले ‘अपराध’ स्वीकार गरेका छन् ।
नेपाली कांग्रेसका नेता एवम् पूर्वमन्त्री मोहम्मद अफताब आलमका भाइ महताबले दाईकै निर्देशनमा बम विस्फोटमा मृत्यु तथा घाइते भएकालाई इटा भट्टामा जलाएको स्वीकार गरेका हुन् ।
भारतीय प्रहरीको सहयोगमा नेपाल प्रहरीको टोलीले महताब आलमलाई आइतबार राति भारतको मोतीहारीबाट पक्राउ गरेको थियो । सोमबार बिहान जिल्ला प्रहरी कार्यालय रौतहटले लिएको प्रारम्भिक बयानका क्रममा महताबले ‘अपराध’ स्वीकार गरेका २ नम्बर प्रदेश प्रहरी कार्यालयले जानकारी दिएको छ ।
पहिलो संविधान सभा निर्वाचन (२८ चैत २०६४)को अघिल्लो दिन २०७४ चैत २७ गते आलमका काका सेख इद्रिसको गोठमा बम विस्फोट भएको थियो ।
चुनावकै दिन बम विस्फोट गराएर नतिजा आफ्नो पक्षमा पार्ने उद्देश्यका साथ आलमले बम बनाउन लगाएकामा बनाउने क्रममा नै बम विस्फोट भएको प्रहरी अनुसन्धानबाट खुलेको थियो ।
बम विस्फोटको घटना सार्वजनिक हुने र आफूविरुद्ध फौजदारी मुद्दा लाग्ने ‘डर’ले आलमले मृतक र घाइते सबैलाई ट्याक्टरमा हालेर राज इटाभट्टाको इटा पोल्ने भट्टीमा हालेर मारिएको थियो ।
घटनाका प्रत्यक्षदर्शी (अदालतमा बयान दिएकासमेत)का अनुसार विस्फोटमा परी २ जनाको मृत्यु तथा कम्तिमा २३ जना घाइते भएका थिए । प्रहरीले भने २ जनाको मृत्यु तथा १६ जना घाइते भएका आफ्नो अनुसन्धान प्रतिवेदनमा उल्लेख गरेको छ ।
बम विस्फोटमा घाइते भएका रौतहटको साविक सरुअठा गाविस वडा नम्बर २ का २२ वर्षीय त्रिलोक प्रताप सिंह (पिन्टु) र २२ वर्षकै ओसी अख्तरलाई पनि इटा भट्टामा हालेर जलाएकोभन्दै परिवारका सदस्यले करिब १३ वर्ष अगाडि प्रहरीमा जाहेरी दिएका थिए ।
सिंह र अख्तरका परिवारले दिएको जाहेरी तत्कालीन अवस्थामा प्रहरीले दर्ता गर्न मानेन ।
पीडित परिवारका तर्फबाट हुलाकमार्फत पनि जोहरी दिइयो । बार एसोसिएसनको रोहबरमा जाहेरीको सनाखत पनि भएको थियो ।
तर, जिल्ला सरकारी वकिल कार्यालय रौतहटले प्रमाण नपुगेको भन्दै मुद्दा नचलाउने निर्णय गरेको थियो ।
जिल्ला सरकारी वकिल कार्यालयको तत्कालीन निर्णयविरुद्ध पीडितहरुले महान्यायाधीवक्ताको कार्यालयमा उजुरी गरे ।
तर, तत्कालीन महान्यायाधीवक्ताको पनि जिल्ला सरकारी वकिल कार्यालयजस्तै मुद्दा चलाउन नमिल्ने निर्णय गरे ।
पछि त्रिलोकका बुवा नारायणसिंह राजपुत र ओसी अख्तरकी आमा रोक्साना खातुनले सर्वोच्च अदालतमा रिट दायर गरे ।
सर्वोच्च अदालतले आलमविरुद्ध मुद्दा नचलाउने जिल्ला सरकारी वकिलको कार्यालय रौतहट र महान्यायाधीवक्ताको निर्णय बदर गरिदियो ।
पीडितका तर्फबाट दिइएको रिटमाथिको १२ औं पटकको सुनुवाईमा सर्वोच्च अदालतकी तत्कालीन न्यायाधी सुशीला कार्की र डा भरतबहादुर कार्कीको संयुक्त इजलाशले १६ जेठ २०६९ मा घटनामाथि पुनः थप अनुसन्धन गर्नु भनि अन्तिम आदेश सुनायो ।
सर्वोच्चले आदेश जारी गरेको ८ वर्षपछि (२०७६ असोज)मा मात्रै प्रहरीले अनुसन्धान प्रक्रिया अगाडि बढायो ।
घटनाका मुख्य योजनाकार भनिएका पूर्व मन्त्री समेत रहेका कांग्रेस नेता मोहम्मद अफताब आलमलाई रौतहटस्थित उनकै निवास नजिकबाट २६ असोज २०७६ मा पक्राउ गरेर अनुसन्धान प्रक्रिया अगाडि बढायो ।
प्रहरीले करिब २० दिनसम्म आलममाथि अनुसन्धान सकेर ८ सय ३३ पृष्ठको अनुसन्धान प्रतिवेदन जिल्ला सरकारी वकिल कार्यालय रौतहटमा बुझाएको थियो । प्रहरीको अनुसन्धान प्रतिवेदनकै आधारमा जिल्ला सरकारी वकिलको कार्यालय रौतहटले बम विस्फोट प्रकरणमा ३९ पृष्ठको अभियोग पत्र जिल्ला अदालत रौतहटमा दायर गर्यो ।
जिल्ला सरकारी वकिलको कार्यालय रौतहटले आलमसहित ११ जनाविरुद्ध विस्फोट पदार्थ ऐन २०१८, मुलुकी अपराध संहिताको दफा (१७७)अन्तर्गत ज्यान सम्बन्धी कसुर (कर्तव्य ज्यान र ज्यान मार्ने उद्योग) गरेको अभियोग लगाएको थियो ।
आलमसहितका १० जना अभियुक्तविरुद्ध बम विस्फोटका घाइतेलाई इटाभट्टामा हालेर मारेको आरोप लगाइएको थियो भने १ जनालाई घटनाको मतियार बनेको आरोप लगाएको थियो ।
पक्राउ पछि अनुसन्धान सकेर अदालतमा उपस्थित गराइएका कांग्रेस नेता अफताबलाई जिल्ला अदालत रौतहटका न्यायाधीश दीपक ढकालको इजलाशले मुद्दाको पुर्पक्षका लागि थुनामा पठाउने आदेश सुनाएको थियो ।
अफताब आलम हाल ललितपुरको नख्खु कारागारमा मुद्दाको पुर्पक्षका लागि थुनामा छन् ।
महताब आलम भने दाई अफताब आलम पक्राउ परेदेखि नै फरार थिए । दाई फक्राउ परेर मुद्दाको पुर्पक्षका लागि जेल गएको १ वर्ष बितिसकेपछि भाइत महताबलाई पक्राउ गर्न प्रहरी सफल भएको हो ।
पक्राउ परेका महताबमाथि अनुसन्धान शुरु गरिएको र अनुसन्धान सकिएपछि जिल्ला अदालत रौतहटमा उपस्थित गराइने जिल्ला प्रहरी कार्यालय रौतहटका अधिकारीको भनाइ छ ।
