संसद विघटनको निर्णयविरुद्ध नेकपाका ४ सांसदले गरे सर्वोच्चमा रिट दायर
काठमाडौँ । प्रधानमन्त्री केपी शर्मा ओली नेतृत्वको सरकारको सिफारिसमा राष्ट्रपतिद्वारा गरिएको संसद विघटनको निर्णयविरुद्ध नेकपाका सांसदहरुले सर्वोच्चमा रिट पेश गरेका छन् ।
नेकपाका सांसदहरु देव गुरुङ, कृष्णभक्त पोखरेल, शशी श्रेष्ठ र रामकुमारी झाँक्रीले मंगलबार दिउँसो सर्वोच्च अदालतमा रिट पेश गरेका हुन् । चारैजना प्रतिनिधिसभा सांसद हुन् ।
उनीहरुले प्रधानमन्त्रीको सिफारिसमा राष्ट्रपतिले संसद विघटन गर्दा आफूहरु ५ वर्षसम्म नागरिकको प्रतिनिधित्व गर्न पाउने हकबाट वञ्चित भएको भन्दै संसद विघटनलाई उत्प्रेषणको आदेशबाट बदर गर्न माग गरेका छन्।
नेकपा सांसद रामकुमारी झाँक्रीले संसद विघटनको निर्णयबिरुद्ध आफूसहित चार जना सांसदहरुले सर्वोच्चमा रिट दायर गरेको जानकारी दिइन् ।
उनीहरुले रिटमा लेखेका छन्, ‘संसद विघटनको निर्णयबाट हामी निवेदक पाँच वर्षसम्म प्रतिनिधित्व गर्न पाउने हकबाट वञ्चित भएका छौं।
‘प्रतिनिधिसभा विघटनसम्बन्धी सम्पूर्ण कामकारबाही र सो सिफारिसका आधारमा भए गरेका सम्पूर्ण कार्यहरु नेपालको संविधानको धारा १३३ को उपधारा २ र ३ बमोजिम उत्प्रेषणको आदेशबाट बदर गरी प्रतिनिधिसभाले गर्नुपर्ने कामहरु सम्पन्न गर्न आवश्यक र उपयुक्त आदेश जारी होस्।
‘मन्त्रिपरिषद्को सिफारिसमा राष्ट्रपतिले गरेको भनिएको प्रतिनिधिसभा विघटन असंवैधानिक भएकाले प्रतिनिधि सभा जीवितै रहेको कुरा सर्वोच्चले भनिदिनुपर्यो ,’ भन्ने माग रिटमा छ ।
रिटमा राष्ट्रपति विद्यादेवी भण्डारी, प्रधानमन्त्री केपी शर्मा ओली र सभामुख अग्निप्रसाद सापकोटालाई विपक्षी बनाइएको छ।
