त्रिभुवन विश्वविद्यालयले स्थगित गर्यो सबै पूर्वनिर्धारित परीक्षा (सूचना)
परीक्षा नियन्त्रक पुष्पराज जोशीले कोरोना भाइरसको दोस्रो प्रकोपले देशका विभिन्न स्थानमा बन्दाबन्दी र निषेधाज्ञा भएका कारण अहिलेको स्थितिमा परीक्षा सञ्चालन गर्न नसकिने भएकाले स्थगन गर्नुपरेको जानकारी दिए।
“केही ठाउँमा बन्दाबन्दी र निषेधाज्ञा शुरु भएको छ”, उनले भने, “ यस्तो बेलामा परीक्षा गर्न सम्भव हुँदैन। त्यसैले सबै परीक्षा स्थगन गरेका हौं।” उनले वातावरण सहज भएपछि परीक्षा सञ्चालन गरिने बताए।
त्रिविको वार्षिक परीक्षाअन्तर्गत स्नातक तह र स्नातकोत्तर तह दोस्रो वर्षका परीक्षा सञ्चालन भइरहेका थिए। यही वैशाख १९ गतेसम्म सञ्चालन हुने परीक्षाअन्तर्गत मानविकी, शिक्षा र विज्ञान सङ्कायका केही विषय मात्र बाँकी थिए।
यस्तै वैशाख १९ गतेदेखि स्नातकोत्तर तहको सेमेष्टरअन्तर्गतका परीक्षासमेत सञ्चालन गर्ने पनिकाको तयारी थियो। यसअघि पनि गत वर्ष चैतमा कोभिड–१९ का कारणले परीक्षा स्थगन गरिएका थिए। ती परीक्षा गत मङ्सिरदेखि निरन्तर सञ्चालन भइरहेका थिए।
कोभिड–१९ सङ्कट व्यवस्थापन केन्द्रको निर्देशक समितिको आइतबार बसेको बैठकले आजदेखि विद्यालय र शिक्षालयको भौतिक उपस्थितिमा हुने पूर्वनिर्धारित परीक्षा अर्को आदेश नभएसम्मका लागि स्थगन गर्ने निर्णय गरेको थियो।
