कोरोना कहरः भारतमा एकैदिन ४ लाख १२ हजार बढी संक्रमित, ३९ सय ८२ को मृत्यु

एजेन्सी । कोरोना सङ्क्रमणको दोस्रो लहरको ‘हटस्पट’ बनेको भारतमा कोरोना भाइरस सङ्क्रमणले नयाँ रेकर्ड बनाउने क्रम पुनः दोहोरिएको छ । दुई दिन लगातार सङ्क्रमितको संख्या घटेपनि आज बढेर फेरी नयाँ रेकर्ड कायम भएको छ ।

पछिल्लो २४ घण्टामा भारतमा ४ लाख १२ हजार ६१८ जनामा कोरोना संक्रमण पुष्टि भएको छ । एकैदिन संक्रमित हुनेको यो संख्या अहिलेसम्मको सबैभन्दा धेरै हो ।

यसअघि भारतमा पहिलो पटक गत शनिबार कोरोना सङ्क्रमितको दैनिक वृद्धि ४ लाख नाघेको थियो । पछिल्लो वृद्धिसँगै भारतमा सङ्क्रमितको संख्या २ करोड १० लाख ७० हजार ८५२ पुगेको छ ।

त्यसैगरी भारतमा कोरोना संक्रमितको मृत्यु दर उकालो लाग्न क्रम पनि जारी छ । पछिल्लो २४ घण्टामा ३ हजार ९ सय ८२ सङ्क्रमितको मृत्यु भएको छ । योसँगै कोरोना संक्रमणका कारण भारतमा मृत्यु हुनेको संख्या २ लाख ३० हजार १५१ पुगेको छ ।

यसकासाथै भारतमा १ करोड ७२ लाख ६९ हजार ७६ जना संक्रमणमुक्त भएका छन् । अब भारतमा सक्रिय सङ्क्रमितको संख्या ३५ लाख ७१ हजार ६२५ रहेको छ ।