काठमाण्डौँ । एचटिपी खबरका अध्यक्ष तथा संचालक दिवाकर शाहविरुद्ध प्रेस काउन्सिलमा उजुरी दर्ता भएको छ ।

शाहले पत्रकार आचारसंहिता पालना नगरी धार्मिक समुदाय माथी खलल् पुग्ने गरी समाचार सम्प्रेषण गरेको भन्दै ईसाई धर्म प्रचारक प्रचारक साजन श्रेष्ठसहित ३ जनाले संयुक्त रुपमा आइतबार काउन्सिलमा उजुरी पेश गरेका हुन् ।

शाहले निर्माण गरेको भिडियोमा धार्मिक समुदायमाथी पुर्बाग्रही ढंगबाट व्यक्तिलाई अभद्र व्यबहार गर्ने र बन्दक बनाई धाक धम्की समेत दिई अपराधीसरह जबरजस्ती प्रहरीमा जिम्मा लगाएकोले सो कार्य मानवअधिकार, धार्मिक स्वतन्त्रता र प्रेस स्वतन्त्रताविरुद्ध भएको आरोप उजुरीमा उल्लेख गरिएको छ ।

पत्रकार आचारसंहिता उल्लङ्घन भएको भन्दै एचटिपी खबरका संचालक शाहविरुद्ध हदैसम्मको कार्बाहीको माग गरिएको छ ।

शाहले “स्वर्ग जाने बाटो क्रिश्चियन धर्म हो भन्दै, गाउँघर देखि राजधानीसम्म धर्म परिवर्तनको खेल” शिर्षकमा भिडियो प्रसारण गरेसँगै धार्मिक सद्भाव विथोल्ने र धार्मिक आस्थामाथि ठेस पुगेको भन्दै ख्रीष्टियन धार्मिक समुदायहरु यतिखेर उनीविरुद्ध आक्रोशित बनेका छन् । भिडियोलाई लिएर शाहको सर्वत्र आलोचना भईरहेको छ ।

नेपालको संविधानले देश धर्मनिरपेक्ष राज्य संस्थागत भई संविधानको प्रस्तावनामै बहुधार्मिक, बहुजातिय, बहुसांस्कृतिक र बहुभाषिक उल्लेख भएको र धारा ४ को २६ मा धार्मिक स्वतन्त्रताको हकः (१) धर्ममा आस्था राख्ने प्रत्येक व्यक्तिलाई आफ्नो आस्थाअनुसारको धर्मको अवलम्बन, अभ्यास र संरक्षण गर्ने स्वतन्त्रता हुनेछ भनी स्पष्ट उल्लेख गरिएको छ । भने, पत्रकार आचारसंहिताको खण्ड ५ को १ र २मा पत्रकार र सञ्चारमाध्यमले गर्न नहुने बुँदाहरु स्पष्ट उल्लेख गरिएको छ ।

पत्रकार र सञ्चारमाध्यमले देहाय अनुसार कार्यहरू गर्नुहुँदैनः
(१) सार्वभौमसत्ता, राष्ट्रिय एकता र सामाजिक सद्भावमा खलल पुग्ने : पत्रकार तथा सञ्चारमाध्यमले नेपालको सार्वभौमसत्ता, भौगोलिक अखण्डता, राष्ट्रियता र स्वाधीनताविरूद्ध एवं विभिन्न जात–जाति, धर्म, सम्प्रदाय, भाषा, संस्कृतिबीचको सुसम्बन्ध र सामाजिक सद्भावमा खलल् पार्ने, जातीय भेदभाव वा छुवाछुतलाई दुरुत्साहन गर्ने, सार्वजनिक शिष्टाचार वा नैतिकताको प्रतिकूल हुने सामग्री उत्पादन, प्रकाशन, प्रसारण र वितरण गर्नुहुँदैन ।

(२) भेदभाव हुने गरी र निजी स्वार्थपूर्तिका लागि सूचनाको सम्प्रेषण : (१) पत्रकार तथा सञ्चारमाध्यमले जातीय, लैङ्गिक, धार्मिक, क्षेत्रीय, भाषिक, राजनीतिक आस्था, वर्ण वा शारीरिक तथा मानसिक अवस्था जस्ता कुनै पनि आधारमा कसैमाथि पनि भेदभाव हुने वा घृणा उत्पन्न गर्ने गरी सामग्री उत्पादन, प्रकाशन, प्रसारण र वितरण गर्नुहुँदैन ।

(२) पत्रकार तथा सञ्चारमाध्यमले त्रसित पार्ने, धम्क्याउने, अनुचित आर्थिक फाइदा उठाउने, व्यक्तिगत स्वार्थपूर्ति गर्ने र कसैलाई अनुचित लाभ वा हानि पु-याउने नियत राखी पत्रकारिताको पेशागत मर्यादा प्रतिकूल कार्य गर्नुहुँदैन ।

प्रतिक्रिया दिनुहोस्