काठमाडौँ- सेयर बजार २८ महिनाकै उच्च विन्दुमा पुगेको छ। मंगलबार ७५.३३ अंक बढेर नेप्से परिसूचक २५६३ अंकमा कायम भएको छ।

कारोबार रकम पनि अघिल्लो दिनको तुलनामा बढेको छ। अघिल्लो दिन १३ अर्ब ९१ करोडको कारोबार भएकोमा आज १४ अर्ब ११ करोड पुगेको छ। २२० कम्पनीको मूल्य बढ्दा २० को घट्यो भने २ को स्थिर रह्यो।

बैंकिङ २.३९, विकास बैंक २.९६, फाइनान्स २.५३, होटल तथा पर्यटन ३.१४, हाइड्रोपावर ३.९७, लगानी ३.८७, जीवन बीमा ४.४५, उत्पादन ३.७७, माइक्रोफाइनान्स १.३९, निर्जीवन बीमा ४.३७, अन्य १.७३ र व्यापार समूह ५.०६ प्रतिशत बढे। होटल तथा पर्यटन समूहको सूचक हालसम्मकै उच्च ६५९१ विन्दुमा पुगेको छ।

६ कम्पनीको मूल्य १० प्रतिशत बढ्यो। बोटलर्स नेपाल बालाजु, समृद्धि फाइनान्स, माण्डु हाइड्रोपावर, हाथवे इन्भेस्टमेन्ट कम्पनी, नेपाल वेयरहाउजिङ कम्पनी, साहस ऊर्जा र हिमालय ऊर्जा विकास कम्पनीको मूल्य १० प्रतिशत बढ्यो। युनिभर्सल पावरको ९.८ तथा पिपुल्स पावरको मूल्य ८.७ प्रतिशत बढेको छ।

गणपति लघुवित्तको मूल्य ५.८ प्रतिशत घट्यो । कारोबार रकमका आधारमा शिवम् सिमेन्ट, अपी पावर, हिमालयन रिइन्स्योरेन्स, साइन रेसुङ्गा विकास बैंक र ङादी ग्रुप पावर क्रमशः अगाडि रहे।

प्रतिक्रिया दिनुहोस्