दिपेश रोक्का । माघ १६ गते रिलिज हुने तयारीमा रहेको नेपाली चलचित्र ‘एक्टर: टेक वन’ले दुई नयाँ पोस्टर र मोशन पोस्टर सार्वजनिक गर्दै दर्शकको ध्यान खिचेको छ। प्रचारको नयाँ रणनीति अपनाउँदै निर्देशक राजन भुसालले चलचित्रलाई थप आकर्षक बनाउन यी पोस्टर सार्वजनिक गरेको बताए।

प्रकाशित दुई पोस्टरमध्ये एकमा चलचित्रका प्रमुख कलाकार प्रदिप खड्का, आना शर्मा, दिव्या रायमाझी, र राजबल्लभ कोइरालालाई देखाइएको छ। यसले पात्रहरूको भावनात्मक सम्बन्ध र कथाको गहिराइलाई झल्काउँछ। अर्को पोस्टरमा भने प्रदिप खड्का र राजबल्लभ कोइरालाको जोडी प्रस्तुत गरिएको छ, जसले चलचित्रको थ्रिलर पक्षलाई उजागर गरेको छ।

यो चलचित्र विशेषतः दुई कारणले चर्चामा छ। पहिलो, अभिनेता राजबल्लभ कोइराला दशकपछि ठूलो पर्दामा फर्किँदैछन्। दोस्रो, अभिनेत्री दिव्या रायमाझीले यही चलचित्रबाट आफ्नो अभिनय यात्रा सुरु गरेकी छन्। दिव्या, चर्चित अभिनेता दिलीप रायमाझीकी छोरी हुन्। अमेरिकाबाट नेपाल फर्केर यो चलचित्रमा ‘बोल्ड एन्ड ब्यूटिफूल’ रूपमा प्रस्तुत भएकी दिव्याले डेब्युमै दर्शकको चासो बटुल्न सफल भएकी छन्।

चलचित्रलाई राजन भुसालले निर्देशन गरेका हुन् भने कथा र पटकथा राजन भुसाल र आकाश बरालले लेखेका छन्। चलचित्रमा प्रदिप खड्का, आना शर्मा, दिव्या रायमाझी, राजबल्लभ कोइरालासहित दिव्य देव, उषा रजक, र सुशील सिटौलालगायतका कलाकारको भूमिका रहेको छ।

‘एक्टर: टेक वन’लाई अदृत फिल्म्स र अ मोती फिल्म्सले संयुक्त रूपमा प्रस्तुत गरेका हुन्। चलचित्रका निर्माता थमन कुमार भण्डारी र सह-निर्माता अनीश भुसाल हुन्। छायाङ्कन नरेन्द्र मैनालीले गरेका छन् भने सम्पादन निमेष श्रेष्ठले गरेका छन्। संगीतकार हर्कुलस बस्नेत, रोहित शाक्य, र एलिस कार्कीले चलचित्रका गीतहरूमा काम गरेका छन्। कोरियोग्राफी शिशिर खाती र किरण थापाले गरेका छन्।

दर्शकहरूले पोस्टर र मोशन पोस्टरलाई अत्यधिक सकारात्मक प्रतिक्रिया दिएका छन्। प्रदर्शनको तयारीमा रहेको यो चलचित्रले नेपाली सिनेमामा नयाँ तरंग ल्याउने अपेक्षा गरिएको छ।

प्रतिक्रिया दिनुहोस्