अमेरिकी राष्ट्रपति डोनाल्ड ट्रम्पले शिक्षा विभाग खारेज गर्न अधिकारीहरूलाई निर्देशन दिने कार्यकारी आदेशमा हस्ताक्षर गरेका छन्। ट्रम्पले आफ्नो चुनावी अभियानका क्रममा यो वाचा गरेका थिए।

‘हामी यसलाई सकेसम्म चाँडो बन्द गर्नेछौँ’, ट्रम्पले बिहीबार आदेशमा हस्ताक्षर गरेपछि भने, ‘यसले हामीलाई कुनै फाइदा गरिरहेको छैन।’

ट्रम्पले लामो समयदेखि यो विभाग खारेज गर्न माग गरिरहेका छन्, तर यसलाई पूर्ण रूपमा बन्द गर्न उनलाई अमेरिकी संसद् कंग्रेसको अनुमोदन चाहिन्छ, जुन सम्भव छैन।

ट्रम्पको कदमले गत हप्ता घोषणा गरिएको एजेन्सी बन्द र ठूलो संख्यामा कर्मचारी कटौती रोक्न खोज्नेहरूबाट कानुनी चुनौती सामना गरिरहेको छ।

‘संयुक्त राज्य अमेरिकाले अन्य कुनै पनि देशको तुलनामा शिक्षामा धेरै पैसा खर्च गर्छ, तर पनि विद्यार्थीहरूको सफलता अझै पनि धेरै कम छ’, ट्रम्पले भने।

शिक्षा विभाग कलेज र विश्वविद्यालयका विद्यार्थीका लागि संघीय विद्यार्थी ऋण व्यवस्थापन गर्ने र कम आय भएका र शारीरिक रूपमा अशक्त विद्यार्थीलाई सहयोग गर्ने निकाय हो।

प्रतिक्रिया दिनुहोस्