वासिङ्टन डिसी । अमेरिकी राष्ट्रपति डोनाल्ड ट्रम्पले राष्ट्रिय सुरक्षालाई प्रमुख कारण देखाउँदै १२ देशका नागरिकहरूलाई अमेरिका यात्रामा पूर्ण प्रतिबन्ध लगाउने एक विवादास्पद कार्यकारी आदेशमा हस्ताक्षर गरेका छन् । यसका साथै, अन्य ७ देशका नागरिकहरूमाथि आंशिक यात्रा प्रतिबन्ध लगाइएको छ ।

यो निर्णय आगामी जुन ९ देखि कार्यान्वयनमा आउने फक्स न्युजले जनाएको छ । ह्वाइट हाउसका अनुसार, पूर्ण प्रतिबन्धको सूचीमा अफगानिस्तान, म्यानमार (बर्मा), चाड, गणतन्त्र कंगो, इक्वेटोरियल गिनी, इरिट्रिया, हैटी, इरान, लिबिया, सोमालिया, सुडान र यमन परेका छन् । यी देशका नागरिकहरूले अब सामान्य अवस्थामा अमेरिकी भिसा प्राप्त गर्न सक्ने छैनन् ।

त्यसैगरी, बुरुन्डी, क्युबा, लाओस, सिएरालियोन, टोगो, तुर्कमेनिस्तान र भेनेजुएलाका नागरिकहरूलाई आंशिक यात्रा प्रतिबन्धको दायरामा राखिएको छ । ह्वाइट हाउसका अधिकारीहरूले यो निर्णय राष्ट्रपति ट्रम्पको चुनावी वाचा अनुसार ‘अमेरिकालाई खतरनाक विदेशी तत्वहरूबाट जोगाउने’ प्रतिबद्धताको हिस्सा भएको बताएका छन् । उपप्रवक्ता अबिगेल ज्याक्सनले भनिन्, ‘अमेरिकी जनतालाई हानि पुर्‍याउन चाहने खतरनाक विदेशी तत्वहरूबाट जोगाउन राष्ट्रपति ट्रम्पले प्रतिबद्धता पूरा गरिरहनुभएको छ ।’

उनले यी प्रतिबन्धहरूलाई ‘साझा समझदारी’को कदम भन्दै थपिन्, ‘यो निर्णय ती देशहरुमा लक्षित छ जसमा उचित जाँच प्रक्रिया छैन, भिसा अवधि नाघ्ने दर उच्च छ र खतरा सम्बन्धी सूचना आदानप्रदान गर्न असफल छन् ।’

बुधबार राति सार्वजनिक गरिएको एक भिडियो सन्देशमा राष्ट्रपति ट्रम्पले हालै कोलोराडोको बोल्डरमा भएको आतंकवादी हमलापछि यो यात्रा प्रतिबन्धको घोषणामा हस्ताक्षर गरिएको स्पष्ट पारेका छन् । ‘कोलोराडोको बोल्डरको घटनाले हाम्रो देशमा प्रवेश गर्ने, ठीकसँग जाँच नगरी आएका विदेशी नागरिकहरूका साथै अस्थायी आगन्तुकका रूपमा आएर भिसा अवधि नाघ्नेहरूबाट उत्पन्न हुने चरम खतरालाई उजागर गरेको छ,’ ट्रम्पले भने, ‘हामी त्यस्ता मानिसहरू चाहँदैनौं ।’

यद्यपि, यो प्रतिबन्ध अमेरिकी ग्रिनकार्ड भएका व्यक्तिहरू, जुन ९ भन्दा अघि नै भिसा प्राप्त गरिसकेकाहरू, केही निश्चित भिसा श्रेणीका आवेदकहरू र अमेरिकी राष्ट्रिय हितमा सेवा पुर्‍याउने व्यक्तिहरूका हकमा भने लागु नहुने समाचारमा उल्लेख छ ।

प्रतिक्रिया दिनुहोस्