काठमाडौं । बागमती प्रदेशका नयाँ मुख्यमन्त्री इन्द्रबहादुर बानियाँले प्रदेशसभाबाट विश्वासको मत प्राप्त गरेका छन् ।

सोमबार बसेको प्रदेशसभा बैठकमा उनले आफ्नो पक्षमा ६३ मत प्राप्त गर्दै सहज रूपमा विश्वासको मत पार गरेका हुन् ।

विश्वासको मतको विपक्षमा २२ मत परेको थियो भने बैठकमा जम्मा ९२ जना प्रदेशसभा सदस्यहरूको उपस्थिति रहेको थियो ।

संविधानको धारा १६८(४) र प्रदेशसभा नियमावली, २०७४ को नियम १४३(१) अनुसार मुख्यमन्त्रीले विश्वासको मत लिएका हुन् ।

बानियाँ नेपाली कांग्रेसका प्रदेशसभा सदस्य हुन् । उनले २० साउनमा बहादुर सिंह लामाविरुद्धको अविश्वास प्रस्ताव पारित भएसँगै मुख्यमन्त्रीको शपथ लिएका थिए ।

बानियाँ नेतृत्वको सरकारलाई सत्ता साझेदार दलहरू नेपाली कांग्रेस र नेकपा एमाले दुवैको समर्थन रहेको छ । दुवै पार्टीले आफ्ना सांसदहरूलाई ह्वीप जारी गर्दै विश्वासको मतमा समर्थन गर्न निर्देशन दिएका थिए ।

प्रतिक्रिया दिनुहोस्