जनकपुरधाम । मधेश प्रदेश सरकारले आगामी आर्थिक वर्षका लागि ल्याएको बजेट ‘रेडबुक’ पुनर्लेखन गर्ने भएको छ । मुख्यमन्त्री सतिस सिंहले कर्मचारीको कारण बजेटमा गडबढ भएको वक्तव्य दिएको केही दिन नबित्दै सरकारले ‘रेडबुक’ पुनर्लेखन गर्न लागेको हो ।

प्रदेश सांसदका धेरै योजनाहरू छुटेपछि सर्वदलीय बैठकको सुझाव अनुसार सरकारले ‘रेडबुक’ मा बजेट थप्ने तयारी गरेको हो । बजेट नै पास नहुने छाँटकाट देखिएपछि मुख्यमन्त्री सिंहले बजेटमा भएको त्रुटिबारे सुझाव लिन बिहीबार सर्वदलीय बैठक बोलाएका थिए ।

उक्त बैठकमा सांसदहरूको इच्छा विपरीत योजनाहरू राखिएको सत्तारुढ तथा प्रतिपक्षका दलका नेताहरू गुनासो गरेका थिए । बैठकमा व्यापक विरोध भएपछि मुख्यमन्त्री सिंहले बजेटमा कर्मचारीहरूबाट त्रुटि भएको स्वीकार गर्दै बजेट सच्याउन तयार रहेको बताएका थिए । त्यसपछि ‘रेडबुक’ मा छुटेका योजनाहरू थप्न आन्तरिक रुपमा मौखिक सहमति भएको नेताहरुले बताएका छन् ।

सर्वदलीय बैठकमा भएको सहमति अनुसार रेडबुक पुनर्लेखन नभए बजेट पास गर्न नदिने नेताहरुकाे चेतावनी छ । यता मुख्यमन्त्री सिंहले भने बजेटमा त्रुटिभएको स्वीकार गर्दै सर्वदलीय बैठकमा भएको सहमति कार्यान्वयन गर्ने बताए ।

खबरहबसंग मुख्यमन्त्री सिंहले भने, ‘यसलाइ पुनर्लेखन नभनौ, संसोधन भनौ । योजनाहरू छुटेको जानकरी गराउन मैले नै सर्वदलिय बैठक डाँकेको थियौ बैठकमा प्रदेश सांसदहरूको धेरै गुनासो आयो, वास्तवमा केही आन्तरिक र कर्मचारीहरुको लाहपरबाहीका कारण त्रुटि पनि भएको छ । बैठकमा योजनाहरू थपेर जाने सहमति भएको छ । अब त्यसै अनुरुप अघि बढ्छौ ।’

उनका अनुसार केही अनाधिकृत योजनाहरू पनि रेडबुकमा समावेश भएका छन् । त्यस्ता योजनाहरूलाई हटाएर छुटेका योजनाहरू समावेश गरिने छ ।

सर्वदलीय बैठकमा सत्तारुढ दलहरूसँगै कांग्रेस, जसपा सहितका दलका नेताहरूको उपस्थिति थियो । प्रदेश सरकारले १ असारमा ४३ अर्ब रुपैयाँको बजेट ल्याएको थियो ।

प्रतिक्रिया दिनुहोस्