काठमाडौं । नेपालका विभिन्न स्थानमा सहकारी खोलेर सर्वसाधारणको अरबौँ पैसा हिनामिना गरेर गितेन्द्रबाबु (जीबी) राई बेपत्ता छन् । उनले सहकारीबाट हजारौँ सर्वसाधारणको अरबौँ पैसा उपचलन गरेका छन् ।

सहकारीको बचत रकम बोकेर जीबी राई विदेशमा लुकेर बसेको आशङ्का गरिएको लामै समय भयो । तर, प्रहरीले उनिबारे सत्य जानकारी दिन सकेको छैन ।

नेपालको संसद्, संसदीय समिति र प्रहरी प्रशासनले जीबीले गरेको आर्थिक अपचलनबारे अनुसन्धान गरिरहेका छन् । तर, जीबी राई कहाँ छन् ? के गर्दै छन् त्यसबारे आधिकारिक जानकारी कसैलाई छैन ।

नेपाल प्रहरीले उनको खोजी कार्य गरिरहेको छ । उनको खोजीका लागि प्रहरीको टोली मलेसिया पुगेको थियो । मलेसियामा जीबीबारे अनुसन्धान गरेर प्रहरीको टोली नेपाल फर्किएको छ ।

एक साताअघि मलेसिया गएको प्रहरी टोली बुधवार नेपाल आइपुगेको प्रहरी स्रोतले जनाएको छ । जीबी राईलाई खोज्दै मलेसिया पुगेको प्रहरी टोलीले उनलाई भेटेको वा नभेटेको बारेमा प्रहरीले खुलाइएको छैन ।

स्रोतका अनुसार जीबी मलेसियामा अपार्टमेन्ट किनेर बसेका छन् । क्वालालम्पुरस्थित देशापण्डनमा उनले ७ करोड नेपाली रुपैयाँभन्दा बढीको अपार्टमेन्ट किनेको बताइन्छ ।

जीबीले सहकारीको रकम उपचलन लगेर मलेसियामा १ अर्ब रुपैयाँभन्दा बढी लगानी गरेको दाबी गरिएको छ ।

प्रतिक्रिया दिनुहोस्