रातोपाटी न्यूज 
काठमाडौं– राष्ट्रिय परीक्षा बोर्डले २०५६ सालयताका कक्षा ११ र १२ मा फेल भएका विद्यार्थीका लागि मौका परीक्षा दिन पाउने व्यवस्था गरेको छ ।
बोर्डले एक सूचना जारी गरी ०५६ साल यता कक्षा ११ र १२ मा भर्ना भई फेल भएका परीक्षार्थीलाई अन्तिम मौका स्वरूप एकपटक परीक्षा दिन पाउने व्यवस्था गरिएको जनाएको छ । जति विषयमा फेल भएका विद्यार्थी पनि मौका परीक्षामा सहभागी हुन पाउने छन् ।
बोर्डकाअनुसार रजिस्ट्रेसन नम्बरको सुरुको अङ्क५६ वा सोभन्दा बढी र ७७ वा सोभन्दा कम भएका परीक्षार्थीहरू सहभागी हुन पाउनेछन् । २०५६ सालदेखि २०७६ सालभित्र भर्ना भई फेल भएका परीक्षार्थीहरू मौका परीक्षामा सहभागी हुन पाउनेछन् ।
बोर्डले प्रयोगात्मकतर्फ फेल भएका विद्यार्थीहरू पनि सहभागी हुन पाउने जनाएको छ । मौका परीक्षामा सामेल हुन चाहने विद्यार्थीले सम्बन्धित विद्यालयबाट आगामी मंसिर २७ गतेभित्र आवेदन फाराम भरिसक्नुपर्ने छ ।
यस्तै, विद्यार्थीले अध्ययन गर्दा सञ्चालनमा रहेको तर हाल खारेज भइसकेका वा सञ्चालनमा नरहेका विद्यालयका विद्यार्थीले सोझै बोर्डमा आवेदन दिन सक्नेछन् ।
बोर्डका अनुसार कक्षा ११ र १२ मा फेल भएर पढाइ छाडेका विद्यार्थीको सङ्ख्या १४ लाख बढी रहेको छ ।
यसअघि त्रिभुवन विश्वविद्यालयले पनि २०५८ सालदेखि र सेमेस्टरतर्फ २०६९ साल देखिको समयसीमा कटेका विद्यार्थीलाई एकपटक मौका परीक्षाको अवसर दिने निर्णय गरेको थियो ।
प्रतिक्रिया दिनुहोस्