काठमाडौँ – इजरायल संगको युद्धविराम भए संगै उत्तरी गाजा बाट विस्थापित हजारौं प्यालेस्टाइनी आफ्नो घर फर्कन थालेका छन् । गाजा पट्टी इजरायलले ध्वस्त बनाइसकेको छ । तर, हजारौं प्यालेस्टाइनी आफ्नो घरको भग्नावशेष खोज्दै पुगेका छन्  ।

यसअघि युद्धविराम सम्झौता अनुसार हमासले बन्धक रिहाइमा ढिलाइ गरेको भन्दै इजरायलले प्यालेस्टाइनी नागरिकलाई उनीहरूको घर उत्तरी गाजामा जान रोकेको थियो । तीन दिन देखि बाटैमा रोकिएका हजारौं मानिसहरु सोमबार आफ्नो घरको भग्नावशेष खोज्दै गरेको देखिएका छन् ।

इजरायल र हमासले अन्य ६ जना बन्धकको रिहाइका लागि सम्झौता गरेपछि विस्थापित प्यालेस्टाइनीहरूको भीड युद्धग्रस्त गाजा पट्टीको उत्तरतिर बढ्न थालेको एएफपीले जनाएको छ ।

अन्तर्राष्ट्रिय सञ्चार माध्यमका अनुसार घरको नाममा केवल ध्वस्त भएका संरचना मात्रै देखिए पनि आफन्त र प्रियजन सँग आफ्नो थातथलोमा फर्कन पाउँदा उनीहरु खुशी भएका छन् ।

यसैबीच अमेरिकी राष्ट्रपति डोनाल्ड ट्रम्पले गाजाका २४ लाख जना नागरिकलाई इजिप्ट र जोर्डनमा पठाएर गाजा सफा गर्ने भन्दै दिएको अभिव्यक्तिको अरब देश, प्यालेस्टाइन, हमास र जिहादी समूहले विरोध गरेका छन् ।

प्यालेस्टाइनका राष्ट्रपति महमुद अब्बासले गाजा बाट प्यालेस्टिनीहरूलाई विस्थापित गर्ने उद्देश्यले आउने कुनै पनि परियोजनाको कडा अस्वीकार र निन्दा गर्ने बताएको अन्तराष्ट्रिय सञ्चार माध्यामहरुले उल्लेख गरेका छन् । एजेन्सी ।

प्रतिक्रिया दिनुहोस्