आउने २/३ महिना भित्र सवारी दुर्घटनामा कमी आएको देखिनेगरी संवद्ध पक्षले परिणाममुखि काम गर्नुपर्ने गृहमन्त्री लेखकको भनाई थियो । उनले गृह मन्त्रालय पनि सवारी दुर्घटनामा तानिने भएकाले आफूले संवद्ध पक्षलाई त्यसो हुन नदिन सचेत गराउनुपरेको पनि स्पष्ट पारे ।

सवारी दुर्घटना हुन नदिनका लागि हरेकले आ–आफनो जिम्मेवारी पूरा गर्नुपर्ने उल्लेख गर्दै गृहमन्त्री लेखकले त्यसका लागि यातायात व्यवस्था परिषद्को फोकल प्वाईन्ट रुपमा काम गर्नुपर्ने पनि बताए । संवद्ध पक्षबीच दैनिक हुने छलफलले सडक दुर्घटना न्युनिकरणमा कमी ल्याउन महत्वपूर्ण भुमिका निर्वाह गर्ने पनि उनले बताए ।

छलफलमा नेपाल यातायात व्यवसायी राष्ट्रिय महासंघले बजार मूल्यको वृद्धि अनुसार सार्वजनिक यातायाताको भाडाको समायोजन गर्नुपर्ने, यातायाता सुधार सुझाव कार्यदलको प्रतिवेदन, २०८० लाई यथाशिघ्र कार्यान्वयन गराउनका लागि पहल गरिदिन सरकारलाई आग्रह गरेको छ ।

महासंघले सडक दुर्घटना न्युनिकरण र यस क्षेत्रको सुधारका लागि अधिकार सम्पन्न संघीय र प्रादेशिक यातायात प्राधिकरण गठन गर्न माग गर्दै आएको छ ।