धनगढी- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारलाई दुई तिहाइ बहुमतको घमण्ड नदेखाउन चेतावनी दिएका छन् ।

धनगढीमा भएको पार्टीको प्रदेश परामर्श बैठकपछि पत्रकारसँग कुरा गर्दै उनले सरकारको सुरुवाती दिन हेर्दा राम्रो लक्षण नदेखिएपछि दुईतिहाइको अंहकार बंगलादेश र श्रीलंकाको हालत हुने भने सम्झाएको बताए ।

‘दुईतिहाइको अंहकार नदेखाउनु भनेर सम्झाएको मात्रै छु,’ उनले नेपाली कांग्रेस र नेकपा एमालेको संयुक्त सरकारतिर लक्षित गर्दै भने भने, ‘उहाँहरूले अलिक बढी गर्न थाल्नु भए भ्रष्टाचारविरुद्ध सडकमा आउँछौं ।’

आफ्नो नेतृत्वको सरकारले थालेको भ्रष्टाचारविरोधी अभियान नरोक्न पनि उनले सचेत गराए ।

‘उहाँहरू संविधानमा माओवादी देख्नुहुन्छ, समावेशी भने पनि माओवादी, समानुपातिक भने पनि माओवादी, दलित, महिला मुस्लिम भने पनि माओवादी, गणतन्त्र भने पनि माओवादी’, प्रचण्डले भने, ‘अहिले दुईतिहाइ भनेर संविधान संशोधन गर्ने कुरा ल्याउनुभएको छ । परिवर्तनका एजेन्डा माओवादीका भएकाले हामीलाई देखाइदिने नाममा जनतामाथि घात गर्ने खतरा आए सडकबाट प्रतिवाद गर्नेछौँ ।’

प्रतिक्रिया दिनुहोस्