रातोपाटी न्यूज 
काठमाडौं – सरकारले सन् २०२४ को पेरिस पाराओलम्पिकमा ऐतिहासिक उपलब्धि हासिल गरेकी प्याराओलम्पिक खेलाडी पलेशा गोवर्धनलाई नगदसहित सम्मान गरेको छ ।
प्रधानमन्त्री केपी शर्मा ओलीले पारा तेक्वान्दो खेलाडीलाई ऐतिहासिक प्रदर्शनको कदरस्वरुप रु ६५ लाख (करमुक्त) प्रदान गरेका छन् ।
पलेशाले पेरिस पाराओलम्पिकमा देशका लागि पहिलो कास्य पदक जितेकी हुन् । यसअघि भदौ २० गते मन्त्रिपरिषद्को बैठकले २१ वर्षीय खेलाडीलाई सम्मान गर्ने निर्णय गरेको थियो ।
प्रधानमन्त्रीको सरकारी निवास बालुवाटारमा युवा तथा खेलकुद मन्त्रालयले आयोजना गरेको विशेष कार्यक्रममा पुरस्कार वितरण भएको हो ।
उनका प्रशिक्षक कविराज नेगी लामालाई पनि सरकारले ५ लाख ८५ हजार र टोलीका व्यवस्थापक रामचन्द्र श्रेष्ठलाई २ लाख ९२ हजार रुपैयाँ प्रदान गरेको छ ।
सो अवसरमा प्रधानमन्त्रीले खेलकुद क्षेत्रलाई प्रोत्साहन गर्ने उद्देश्यले खेलाडीलाई कर छुट दिने निर्णय भएको घोषणा गरे ।
उनले पलेशाको यो उपलब्धि देशका लागि सर्वोच्च खेलकुद अवार्ड र नेपालका लागि गौरवको स्रोत भएको बताउँदै सरकारले अन्तर्राष्ट्रिय मञ्चमा थप सफलता हासिल गर्ने विश्वास व्यक्त गरे ।
कार्यक्रममा युवा तथा खेलकुदमन्त्री तेजुलाल चौधरी, सचिव सुमनराज अर्याल, राष्ट्रिय खेलकुद परिषद्का सदस्य–सचिव टंकलाल घिसिङ, नेपाल तेक्वान्दो संघका पदाधिकारीहरुको उपस्थिति रहेको थियो ।
मन्त्रीले पलेशाको उच्च शिक्षाको खोजी र आगामी एसियाली खेलकुदमा उनको सहभागितामा सहयोग गर्ने प्रतिबद्धता व्यक्त गरे ।
खबर पढेर तपाईलाई कस्तो महसुस भयो ?
मन पर्यो (१००%)
मन परेन (०%)
तटस्थ (०%)
रिस उठ्यो(०%)
प्रतिक्रिया दिनुहोस्