काठमाडौं । कैलालीस्थित धनगढी विमानस्थलमा प्रधानमन्त्री केपी शर्मा ओलीविरुद्ध नाराबाजी भएको छ ।

शुक्रबार बिहान नेकपा एमालेबाट बहिर्गमनमा परेपछि मातृभूमि जागरण अभियान चलाइरहेका डा. भीम रावल धनगढी पुग्दा प्रधानमन्त्री ओलीविरुद्ध नाराबाजी भएको हो ।

रावल विमानस्थल ओर्लिँदा उनका समर्थकहरूले एमालेको विरोधमा नारा लगाए थिए । उनीहरुले ‘भीम रावल आऊ, देश बचाऊ’, केपी ओली मुर्दावाद’ लगायता नारा लगाएका हुन् ।

विमानस्थलमा पत्रकारहरुसँग कुराकानी गर्दै नेता रावलले सबै देशभक्तलाई समेटेर वैकल्पिक शक्ति बन्ने दाबी गरेका छन् । हालै विराटनगर गएका बेला राजावादीहरुले स्वागत गरेको विषयमा उनले राजावादीलाई भेट्दैमा आफूलाई पनि राजावादी भन्न नमिल्ने बताए ।

रावल पत्रकार भेटघाटपछि गृहजिल्ला अछामको रामारोशनतर्फ प्रस्थान गरेका छन् । उनी नेकपा एमालेका स्थायी कमिटी सदस्य कर्ण थापासँग हवाईजहाजको एउटै सिटमा बसेर काठमाडौंबाट धनगढी पुगेका थिए ।

प्रतिक्रिया दिनुहोस्