काठमाडौं । प्रधानमन्त्री केपी शर्मा ओली मंगलबार थाइल्याण्डको औपचारिक भ्रमणमा जाँदैछन् । यस भ्रमणका क्रममा उनले बैंककमा आयोजना हुने बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) को छैटौं शिखर सम्मेलनमा सहभागिता जनाउनेछन् ।

प्रधानमन्त्रीको सचिवालयका अनुसार, ओली मंगलबार दिउँसो १२:३० बजे त्रिभुवन अन्तर्राष्ट्रिय विमानस्थलको अति विशिष्ट कक्षमा पत्रकारहरूसँग कुराकानी गरेर थाइल्याण्ड प्रस्थान गर्नेछन् । बैंककमा रहँदा उनले शिखर सम्मेलनलाई सम्बोधन गर्ने कार्यक्रम रहेको छ । भ्रमणपछि उनी आगामी शनिबार, चैत २३ गते, स्वदेश फर्किने छन् ।

प्रधानमन्त्री ओली थाइल्याण्डका प्रधानमन्त्री फेथोङथान सिनावातको मैत्रीपूर्ण निमन्त्रणामा औपचारिक भ्रमण गर्दैछन् । भ्रमणको पूर्वसन्ध्यामा उनले पूर्व प्रधानमन्त्री, पूर्व परराष्ट्रमन्त्री तथा उच्च राजनीतिक नेतृत्वसँग छलफल गरेका थिए । आइतबार सम्पन्न उक्त बैठकमा पूर्व प्रधानमन्त्री डा. बाबुराम भट्टराई, मन्त्रिपरिषद्का पूर्व अध्यक्ष खिलराज रेग्मी, परराष्ट्रमन्त्री डा. आरजु राणा देउवा, साथै विभिन्न पूर्व परराष्ट्रमन्त्रीहरू सहभागी थिए ।

प्रधानमन्त्रीको यो भ्रमण तथा बिम्स्टेक शिखर सम्मेलनमा नेपालको सहभागितालाई नेपाल सरकार, मन्त्रिपरिषद्को चैत ११ गतेको बैठकले स्वीकृति प्रदान गरिसकेको छ ।

प्रतिक्रिया दिनुहोस्