चलचित्र विकास बोर्डको आयोजनामा नेपाली फिल्मका छायांकारहरूका लागि १० दिने ‘ड्रोन पाइलट’ कार्यशाला सुरु भएको छ। कार्यशालाको उद्घाटन बोर्ड अध्यक्ष दिनेश डीसीले गरे।

डीसीले नवीन प्रविधिको प्रयोगले गुणस्तरीय फिल्म निर्माणमा महत्वपूर्ण योगदान पुर्‍याउने विश्वास व्यक्त गरे। कार्यशालामा २५ जना छायांकारहरू सहभागी भएका छन्।

कार्यशालाको उद्देश्य छायांकनमा ड्रोन प्रयोग गर्दा दक्ष जनशक्तिको कमी पूर्ति गर्नु हो। कार्यशालामा प्रद्युम्न मिश्र, मनकृष्ण महर्जन, नीरज कँडेल, स्थिर छविकार राजभाइ सुवाल, कुवेर डंगोल, र डकुमेन्ट्री फिल्ममेकर शान्ता नेपालीलगायत छायांकारहरू सहभागी भएका छन्।

ड्रोन हब नेपालले कार्यशाला संयोजन गरेको छ। तालिम दिने प्रशिक्षकहरूमा ड्रोन विशेषज्ञ प्रवीण भट्टराई, प्रहरी निरीक्षक, र प्रभु हेलिका पाइलट सम्मिलित छन्।

यससँगै, बोर्ड कर्मचारीलाई संचार सीप सम्बन्धी विशेष तालिम दिने कार्यक्रम पनि राखिएको छ। उद्यमी निर्वाण चौधरी र अध्यक्ष डीसीले जीवन जिउने सीपबारे प्रेरणादायी भाषण दिने छन्। अध्यक्ष डीसीले बैशाख १ गतेसम्म हरेक दिन कुनै न कुनै कार्यलाई निरन्तरता दिने प्रतिबद्धता व्यक्त गरेका छन्।

प्रतिक्रिया दिनुहोस्