काठमाडौं । भारत भ्रमणमा रहेका भुटानी राजा जिग्मे खेसार नाम्ग्याल वाङ्चुक आज नेपाल भ्रमणमा आउने भएका छन् । आफ्नो देश फर्किने क्रममा उनले काठमाडौँलाई ट्रान्जिट स्थानको रूपमा रोजेका छन् ।

चारदेखि पाँच घण्टाको छोटो बसाइमा राजा जिग्मेले काठमाडौँका दुई प्रमुख धार्मिक स्थल स्वयम्भूनाथ र बौद्धनाथको दर्शन गर्ने कार्यक्रम रहेको छ ।

राजा जिग्मे बिहान ९:५० मा त्रिभुवन अन्तर्राष्ट्रिय विमानस्थलमा अवतरण गर्नेछन् । विमानस्थलबाट सिधै स्वयम्भूनाथ जाने योजना रहेको छ । स्वयम्भूको दर्शनपछि उनी बौद्धनाथमा पनि पुग्ने कार्यक्रम छ । दुवै धार्मिक स्थलको भ्रमणपछि उनी विमानस्थल फर्की भुटान प्रस्थान गर्ने छन् ।

नेपाल सरकारको तर्फबाट राजाका लागि सुरक्षा र सेवा सुविधाको विशेष व्यवस्था गरिएको छ । त्रिभुवन विमानस्थलको सुरक्षा व्यवस्था बुधबारदेखि कडा पारिएको छ ।

नेपाल भ्रमणको दौरानमा भुटानी राजाले औपचारिक भेटघाट नगर्ने प्रहरी स्रोतले जानकारी दिएको छ । राजा जिग्मे खेसारको यस भ्रमणलाई धार्मिक आस्था र नेपाल-भुटान सम्बन्धको सांस्कृतिक महत्वका रूपमा हेरिएको छ ।

प्रतिक्रिया दिनुहोस्